1. serbska kulturna brigada

Z Wikipedije, swobodneje encyklopedije
Dźi do: Nawigacija, Pytać

1. serbska kulturna brigada je kulturny cyłk serbskich gymnaziastow, kotryž so dnja 25. januara 1949 załoži. Wona wuńdźe ze serbskeho młodźinskeho hibanja po druhej swětowej wójnje a je zwjazana z wuwićom prěnjeje gymnazialneje šule serbskeho ludu. Natwarjejo na kulturne tradicije šulskeje młodźiny wobsteji brigada dźensa z měšaneho chóra, rejowanskeje skupiny a orchestra. Někak 90 młodostnych w starobje 15 do 20 lět su sobustawojo kulturneho ćělesa, kiž so kóždu srjedu a někotryžkuli kónc tydźenja a w lětnych zwučowanskich lěhwach w mjenowanych spartach schadźuja.

1. serbska kulturna brigada wěnuje so w prěnim rjedźe pěstowanju a šěrjenju serbskeho hudźbno- kulturneho herbstwa a načasneje hudźbneje literatury. Do jeje repertoira słušeja pak tež ludowe a wuměłske spěwy słowjanskich susodow a němske klasiske a moderne twórby.

Wosebite wjerški za šulerjow a nawodow w poslednich lětach: K 50. róčnicy załoženja Serbskeho gymnazija předstaji kulturna brigada dwě prapremjerje: "Łužisko-serbsku bjesadu" Bjarnata Krawca a zhromadnje z dźiwadłowej skupinu młodźinsku spěwohru "Fecer". W jutrownym času 1998 spěwaše chór brigady wurězki z počasowych oratorijow H. Zejlerja a K. A. Kocora. W lěće 1999, k jeje 50. narodninam wuhotowa swjedźenski koncert z prapremjeru sceniskeje swity "Prjed hač lipa kćě" Günthera Schwarzy. Spočatk januara 2000 słyšachu Serbja prěni raz Krawcowu "Hodownu spěwohru" z lěta 1919, chór brigady z orchestrom a solistami SLA ju předstaji a lěto na to wospjetowa. We wobłuku swjatočnosćow k 1000-lětnemu jubilejej Budyšina swjatki lěta 2002 spěwaše zhromadnje z druhimi prapremjeru chóroweje sinfonije "1000 lět Budyšin" wot G. Schwarze.

Na najwšelakoriše koncerty přiwabja kulturna brigada připosłucharjow w dwurěčnej Łužicy, ale tež za hranicami. Tak na přikład zarjaduje so brigada do tradicionalnych nazymskich a hodownych koncertow, přeprošuje so ke kulturnym wjerškam wosadow a gmejnow, je sobuorganizator beneficnych koncertow, wobdźěli so na chórowych wurisanjach kaž na přikład w Moskwje a Walesuabo wustupi w Praze a Warnoćicach. Trójce bu brigada we wobłuku "Młodźina hudźi" ze Sakskeje do Badensko-Württembergskeje delegowana.

1. serbska kulturna brigada wuznamjeni so 1972 z mytom Ćišinskeho druheje rjadownje a 1997 z mytom Domowiny za dorost.

Tuchwilny nawoda chóra brigady je Friedemann Bejma.

Z Wikipedije, swobodneje encyklopedije