Rudolf Mjeń

Z Wikipedije, swobodneje encyklopedije
Dźi do: Nawigacija, Pytać

Rudolf Mjeń (němsce August Theodor Rudolph Möhn; * 28. januara 1767 w Njeswačidle, † 1. januara 1841 w Lubiju) bě serbski farar a basnik.

Narodźi so jako syn Njeswačanskeho ewangelskeho fararja Jurja Mjenja a wopyta wot 1780 do 1785 gymnazij w Budyšinje. Po zakónčenju šule a nanowej smjerći poda so w lěće 1785 na studij teologije do Wittenberga, hdźež bě z čłonom Serbskeho prědarskeho towarstwa. Po nawróće do Łužicy w lěće 1788 dźěłaše najprjedy jako pomocny prědar w Budestecach a wot 1793 do 1808 jako farar w Kotecach. Mjez 1808 a 1832 bě archidiakon w Lubiju a zdobom farar w Lěwałdźe, wot 1832 do 1835 zastupjer wyšeho fararja a po tym hač do jeho smjerće z Lubijskim wyšim fararjom.

W lěće 1806 wuda Rěčerski kěrluš swojeho nana k prěnjemu razej w ćišću a přida swoje přebasnjenje do němčiny kaž tež pokazku Jurja Mjenoweho přełožka Klopstockoweho „Messiasa“. Za čas jeho žiwjenja bě w Serbach sławjeny basnik, kotryž pěstowaše na jednym boku hišće barokne basnistwo, pěsnješe pak tež hižo w stilu ludoweho spěwa, čehoždla płaći z bjezposrědnim předchadnikom Handrija Zejlerja.

Nimo ludowych pěsnjow, pěsnjow na wojakow a někotrych składnostnych basnjow zawostaji wobšěrny žiwjenjoběh w němskej rěči.

Wozjewjenja[wobdźěłać | žórłowy tekst wobdźěłać]

Žórło[wobdźěłać | žórłowy tekst wobdźěłać]

  • Franc Šěn: Mjeń, Rudolf. W: Jan Šołta, Pětr Kunze, Franc Šěn (wud.): Nowy biografiski słownik k stawiznam a kulturje Serbow. Ludowe nakładnistwo Domowina, Budyšin 1984, str. 383sl.
Z Wikipedije, swobodneje encyklopedije